صنعاءنيوز/عمرو أدم و منة محمد -

بقولك ايه هقابلك الساعه 4 العصر...قدامك يومين ويكون الواجب خلصان!..هستلم منك الشغل ده بعد بكره!.. المشروع ده هيتنفذ في مده تتراوح من 5 ل 8 سنوات !.. قدامنا 10 سنين ونبقي دولة متقدمه

مواعيد مواعيد مواعيد ...وطبعا بما ان اللي بيقرأ المقال مصري...فعارف ان المقابله تمت الساعة 10 بالليل والواجب لسه مخلصش والشغل هيتسلم نهاية الشهر والمشروع اتوقف!....

طيب يا مصري بالشكل ده ازاي مصر هتتقدم؟؟!

في نفس السياق بالظبط وعود ال 100 يوم ...فاكرينها؟ الوعود دي كانت من سنة يعني من 365 يوم وحتي الان لم تنفذ بعد حتي 20% منها ! "عادي ايه يعني احنا ورانا ايه؟! "

اما المشروع الاكبر والأهم هو مشروع النهضة اللي الإخوان ضحكوا به علي الشعب المصري..والكل عصر علي نفسه ليمونه وانتخب الدكتور مرسي مش عن اقتناع ولكن املاً في تحقيق مشروع النهضة الوهمي , اللي الإخوان طلعوا اذكي مننا كلنا ولعبوا علي عنصر الوقت اللي عارفين ان الشعب المصري بطبيعته مش بيعمل للوقت حساب وغرقانين في الرحرحه!

وعلشان كده قالوا مشروع النهضه الشعب هيجني ثماره في 2025 اي بعد 12 سنه من الان...12 سنة في مشروع نهضه مش قادرين ينفذوا فيه خطه ال 100 يوم اللي يا عالم مش قبل سنة كمان علي الاقل علشان تتحقق وتبقي علي ارض الواقع...

يبقي ال 100 يوم تتنفذ في سنتين... ال 12 سنة هتتنفذ في قد ايه...ياتري مين يعيش!

بس دي مش اول مره يتضحك علي الشعب بمشاريع اما وهمية او مشاريع لا تكتمل وهلي سبيل المثال مشروع توشكي هو فين ؟ اتوقف ؟ طيب ليه ؟! النظام السابق...طيب ليه ميرجعش دلوقتي؟!

ونتيجه فقدان الشعب المصري لعنصر الوقت والزمن عمالين نرجع لوراء , ودول اخري بدون ذكر اسماء كانت مجرد صحراء واصبحت الان من اكبر الدول تقدماً..واحنا لسه محلك سر مش بس كده كما بنتراجع ...

انتبه مصر ترجع الي الخلف !!