بقلم محسن العبيدي الصفار -




خرج سعيد الى عمله بعد قضاء ليلة كاملة مع اعطال الكهرباء في بيته في حر الصيف اللاهب ذاق فيها الأمرين وعقد العزم أن يراجع شركة سياحية بعد الدوام لإصطحاب زوجته وأطفاله في رحلة إستجمام خارج البلد يهربون بها من حر الصيف ويجددون نشاطهم وهو أمر كان يعّد له من سنين ويجمع ويوفر من معاشه لهذا الغرض فطالما سمع من أصحابه الذين سافروا الى الخارج كيف تمتعوا بأوقاتهم وعادوا ومعهم الصور التذكارية وهو يتفرج ويتحسر ولكن هذه السنة سيكون هو الذي يضحك ويتباهى أمام أصحابه بسفرته الرائعة !!!
بعد الدوام توجه الى شركة سياحية تقع قرب عمله دخل فشاهد أنواع البوسترات المعلقة عن الدول المختلفة وشاشات تلفزيونية ضخمة تعرض أفلاماً عن البلدان وفنادق ومنتجعات تأخذ العقل وبينما هو سارح في الخيال أيقظه صوت ناعم:
- أهلين مسيو كيف فيني أساعدك؟
جلس مقابل الطاولة التي تجلس خلفها فتاة جميلة وقال :
- والله اني ابغي هالسنة اروح انا وعيالي سفرة سياحية نخلص فيها من الحر والغبار وش تنصحيني؟
- ولو مسيو!! اي احنا عندنا كل شي وكل مكان انت بس اطلب ونحنا نلبّي!!
- ما قصرتي مشكورة يا بنيتي! ألحين وش هي الدول اللي عندكم؟
- بدك تروح امريكا ؟
- اعوذ بالله اروح امريكا ؟ من قلة الامريكان اللي عندنا ؟ وبعدين ماسامعة كل واحد يروح امريكا شيسوون فيه بالمطارات ؟ بهذلة لا لا لا !!
- تحب أوربا؟
- لا , لا يقولون وايد (واجد) غالية اوروبا هالايام اليورو مولّع نار اللي يروح اوروبا يدش بعدها السجن من الديون !!!
- طيب شو رأيك ببلغاريا؟
- وش فيها بلغاريا ؟
- فيها ساحل يجنن ياي!!! إسمه الرمال الذهبية
- والله تعرفين إحنا عائلة محافظة وزوجتي وبنيتي ما يقدرون ينزلون البحر مع رجال أغراب
- ولو مسيو!! كثير من زباينا عوائل محافظة بس يوصلوا على هونيك بيصيروا غير شكل مايوهات بكيني و تنانير قصيرة!! فيه مثل بيقول إذا رحت على روما بدك تصير مثل الرومان!!
- لا حول ولا قوة إلا بالله!! أنا لا أبغي أروح روما ولاأصير مثل الرومان! ألحين ما يستحون على وجوههم علشان طلعوا من الديرة يتفصخون ويسوون شغل مسخرة!!!
حسبي الله عليهم!!! واحد صاحبي راح لبنان بيقول شفت واحدة حلوة وعاملة شعرها مثل الأسلاك الشائكة اللي بيحطونها حول المواقع العسكرية وثيابها يا عيني!!! اللي يشوفها يقول هالمسكينة ما عندها فلوس تشتري متر قماش على بعضه
- ايه وشو صار بعدين؟
- ولا شي بيقول ضنيتها أجنبية برازيلية وإلا شغلة من النوع يقول قربت صوبها وقلت هاي ( Hi ) اكسكيوزمي (excuse me ) اي ام اراب مان (I am arab man )
- عادي شو فيها!!!
- اسمعي للآخر
- أوكي تفضل
- بيقول دارت وجهها وقالت بالعربي وبلهجتي ( وانت من قالك انك فرنسي؟ علشان تقول انك عربي؟ ما تستحي على ويهك ( وجهك ) جذي (هكذا) تعاكس بنات الناس ؟
- هاهاها ايه بتصير كثير بلبنان
- لسه ما خلصت
- لسه فيه كمان؟
- بيقول طالعت زين بويهها ( وجهها ) شفت ما انه غريب علّي الصوت بعد سامعه وفجأة عرفتها بنت جارنا!!! قلت لها ( عنود هاذي انتي؟ ) حسبي الله عليج ( عليكي) ألحين انتي في الديرة عندنا ما شاء الله ذاك اللبس المحتشم ومحجبة وهني انت مفصخة ( عارية )؟ وين أبوج ( أبوكي )؟ قالت له في الملهى الليلي!! حسبي الله على الناس اللي ما تخاف ربها!!
- يا مسيو انت ليش زعلان كل واحد حر بحياته!!
- المهم وش فيه عندكم غير بلغاريا هذي؟
- تروح جزر تاهيتي؟ فيها شمس وبحر تاخذ العقل
- ألحين أنا هربان من كل شي إسمه شمس انتي تبغيني أروح بلد فيها شمس ليش ما تطرشيني ( تبعثيني ) أفريقيا بالمرة؟
- والله اذا بدك في عندنا رحلات سافارى!!
- وش هالسفارى؟
- يعني بركبوك سيارة وتبرم بين الأسود والنمور والذئاب طول النهار
- والله حالة اذا بغيت أفتر ( أطوف ) بين الأسود والنمور والذياب باروح السوق عندنا ما شاء الله التجار ينهشون لحم الواحد أحسن من 10 أسود ونمور كلها دقيقتين من دخلة الواحد على السوق إلا ياكلون لحمه وعظمه بعد!!
- طيب بدك تروح لبنان؟
- شبسوي بلبنان؟ لا عندهم كهرباء ولا ماي وما شاء الله كل يوم ضرب ومضروب!!
- طيب سورية؟
- يقولون صارت واجد غالية وأسعارها مثل أوروبا!!!
- طيب الهند؟
- هاها والله ضحكتيني!! من قلة الهنود عندنا في الديرة باروح الهند؟!! احنا عندنا هنود اكثر من الهند نفسها إن دخلتي مطعم أكل هندي والموسيقى هندية والحلاق هندي والموظف هندي والله خايف أن عزرائيل اذا اجاني يقبض روحي بالهندي!!!
- لا سلامتك ولو بعدك شباب! المهم حيرتني وين بدك تروح ما ظل غير القطب الشمالي!!!
- لا يقولون هناك وايد دببة قطبية وخطيرة!!!
- طيب بدك القاهرة؟
- لا وايد زحمة وضجيج ودخان وتلوث!!
- تروح روسيا؟
- لا لا يقولون كلها مافيا روسية وعصابات !!
- ماليزيا؟
- بعيدة وايد (واجد) وبعدين انتي شايفة شركات الطيران كل يوم يرفعون اسعار التذاكر بحجة ارتفاع اسعار النفط !!

- يا عمي راح تجنني طيب قول انت وين بدك تروح؟
- والله ابغي مكان مريح ورخيص ما يكلفني السفر اله شي كثير ولا الإقامة فيه تتعبني انا والعيال !! أكل فيه الأكل اللي يعجبني وانام مرتاح زوجتي وعيالي ياخدون راحتهم في اللبس وكل شي عندكم رحلة من هالنوع؟
- ايه عندنا عز الطلب الك يا عم!!
- حلو وين؟
- في بيتكم!! فيه كل هالأشياء اللي قلتها وريح بالك وبالنا!!! ورح على بيتكم صيف هونيك تحت المكيف واذا اشتهيت بحر روح تحت الدوش واذا حسيت حالك بدك تسمع ناس تحكي اجنبي بسيطة افتح أي قناة عربية راح تلاقي الناس فيها بتحكي كل اللغات الا العربي مبسوط هيك ؟ موظف وسياحة ؟ مابتضبط .