صنعاء نيوز عبد الكريم الرازحي -
هذا الزمان غدّارْ
فيهِ الغنمْ
تُذبح بغير جزارْ
والطائره
تقلع بدون طيارْ
والكهرباء
واصل، بدون تيّارْ
***
يا راعيه
العهد ذا رمادي
نِحْنا بوادي الموت
وهم بوادي
شنّوا علينا الحرب يا فؤادي
شلّوا علينا الخبز والزبادي

يا راعيه
هذا الزمان فَاسِخ
العلم فَسَخ
والجهل قاهو رَاسخ
والنمله فوق الفيل
قَي مُفالِخ
والدُندغه
داعس حَنَش وِشَالِخ
والعُنصُرَه
تِعلّمت تُلامِخ
قا دَوّخت بالصقر
قا هُوْ دايخ
والدّودْ كِبار
والقرود مشايخ

ياراعية
قاهُمْ عليكْ عصابة
والشعر ما ينفع
ولا الكتابة،
لو تعزفي عُمْرِكْ
على الربابة
لا شْتِحْتَركْ نملة
ولا ذبابة.
***
ياراعية
عُمْرِكْ زَلَجْ غلايبْ
نشوان ماتْ
وغابت الجَوَالِبْ،
لا عاد نُجوم
تُبْدِيْ
ولا سحايِبْ
دهرِكْ عطش
وعيشتِكْ مصايبْ،
ليلِكْ ظلامْ
وليلتِكْ عقاربْ
مسكين!
كم سكين في الجَشَايبْ!
يانَا عليكْ
قلبي عليكْ ذايبْ.
***
يا راعية
مافيش معكْ شهادة
معِكْ غنم
لكن بلا قيادة
دوله معك
لكن بلا سيادة
فرْشِكْ معِكْ
لكن بلا قعادة
زادوا اللصوص
تناتفوا الوسادة.
***
يا راعية
قا كمَّلوا الخِزانة
هاذُمْ ذئابْ
ما فيش لهم أمانة،

عبد الكريم الرازحي