صنعاء نيوز/ اوس الارياني -

فتى إريان قال الحبّ عشعشْ
بقلبي بعد ما شفت المنقّشْ
نَقَشْ وردَه على يدّه شذاها
سَحَرْ من روعته قلبي فنَعْنَشْ
طرقْت الباب صيّح: "من ببابي"
فقلْت: "الصبّ عند الباب فرَّشْ"
فَتَحْ لي الباب والورد المندّي
على الخدّين تحت العين فَتَّشْ
وقطْرات النّدى سالت وقالت
"فديت الخدّ ذي كنّه تروَّشْ"
وشعره مطّرحْ لى فوق جيده
وفوق الكتف والثوب المزرْكَشْ
وعقد اللول في صدره يغطّي
على رمّانه الحالي المقَرَّشْ
وخصْرَه ينثنني والقلْب يرْجف
إذا اتْمايَلْ بخَطْواتَه ويرْعَشْ
وخلخاله عَزَفْ لمّا ترقّص
لحون اليافعي واحمد والاخفشْ
طرحْت ايدي على شعره فبرّقْ
وقال "ارزى" وعينه قالت "ادغشْ"
ومن فمّهْ أنا قرّبْت فمّي
حمى الأنفاس خلّى اللوز قرْمشْ
لقيت انه مولّع مثلما انا
فضمّيته وحسّيته ترخْشَشْ
فقبّلته على خدّه وفمّه
وذوّقْني العسل وانّي مشوّشْ
عجزْت ارزى وخفت انّي أكمّل
فحطْ يدّه على ظهري وكوّشْ
مسكْ راسي وقرّب منّه اذني
وقرّبني وشاورني ووشوشْ
"إذا ما سرْت في دربك فواصلْ
ولا توقف ولا تحْنَبْ وتحوَشْ"
فواصلت الطريق اللي بدأته
وقلبي بعد طول الهمّ فَرْفَشْ

#حكم_أوسية